கலைத்திறன் படைக்கும் வளரிளம் தமிழர்கள்

தமிழரது கலை வடிவங்களைத் தமிழினத்தின் இளைய தலைமுறை கற்றும் கண்டும் உணரவும், அதனூடாகப் படைப்பாக்கத் திறனைப் பெறவும், தமிழர் கலைகள் அழிந்துவிடாது காக்கவும் கலை அரங்காற்றுகை செயலாக்கம் பெறுதல் வேண்டும். புலம்பெயர் நாடுகளில் மூன்றாந் தலைமுறைத் தமிழர்களும் தமிழர் கலைகளை அறிந்துகொள்ளவும் பயிலவும் களம் அமைத்துக் கொடுக்கும் நோக்கோடு, தமிழ்க் கல்விக் கழகத்தின் கலைப்பிரிவு கலைத்திறன் போட்டியை நடாத்தி வருகிறது. இக்கலைத்திறன் போட்டியில் மயிலாட்டம், புலியாட்டம், காவடியாட்டம், காவடி, கரகம், பொய்க்காற்குதிரை, வில்லுப்பாட்டு போன்ற கிராமியக் கலைவடிவங்களுடன் பரதநாட்டியம் மற்றும் விடுதலை நடனம், விடுதலைப் பாடல், வாய்ப்பாட்டு ஆகிய ஒன்பது கலைகள் போட்டிகளாக நடைபெறுகின்றன. தமிழ்க் கல்விக் கழகத்தின் நிர்வாகப் பொறியமைப்பில் தென்மேற்கு மாநிலத் தமிழாலயங்களுக்கான போட்டியரங்கம் எஸ்சிங்கன் (லண்டவ்) நகரிலே பொதுச்சுடர் ஏற்றலோடு தொடங்கிய அதேவேளை, உலகப் பெருமன்றமான ஐக்கிய நாடுகள் சபை நோக்கித் தமிழின அழிப்புக்கு நீதிகோரி ஈருருளிப் பரப்புரைப் பயணத்தை மேற்கொண்டு செல்லும் வழியில், லண்டவ் நகர முதல்வரைச் சந்தித்துத் தமது கோரிக்கை மனுவைக் கையளித்துச் செல்வதற்காக வருகை தந்திருந்த மாந்தநேயச் செயற்பாட்டாளர்களோடு, நடுவர், தமிழ்க் கல்விக் கழகத்தின் செயற்பாட்டாளர் மற்றும் மாநிலப் பொறுப்பாளர் ஆகியோர் இணைந்து மங்கல விளக்கினை ஏற்றிவைத்தனர்.
சிறந்த காலநிலையோடு காலைப்பொழுதிலே அரங்கம் நிறைந்திருக்கக் கலைத்திறனோடு களமாடிய தமிழாலய மாணவர்கள் குழுநிகழ்வுகளுக்கு நிகராகத் தனியொருவராகப் பங்குபற்றும் வாய்ப்பாட்டு மற்றும் விடுதலைப்பாடல் போட்டிகளிலும் தனித்தன்மையை அரங்கிலே பதிவு செய்தனர். நாட்டார் பாடல், திருப்புகழ் மற்றும் விடுதலைப் பாடல்களை மனனம் செய்து பாடினர். குறிப்பாக விடுதலைப் பாடல்களைப் புலத்திலே பிறந்து வளர்ந்துவரும் மூன்றாந்தலைமுறைக் குழந்தைகள் பாடிப் பார்வையாளர்களது பாராட்டைத் தமதாக்கினர்.
போட்டியரங்கிலே பங்கேற்புக்கான மதிப்பளிப்புகள் வழங்கப்பட்டதோடு, வெற்றியாளர்களுக்கான மதிப்பளிப்புகளும் நடைபெற்ற அதேவேளை, தென்மேற்கு மாநிலத்திலே முறையே முதல் மூன்று நிலைகளைத் தமதாக்கிய பிராங்பேட், பாட்சுவல்பாக் மற்றும் டாம்ஸ்ரட் – றோஸ்டோர்வ் தமிழாலயங்களுக்குப் பாராட்டிதழும் வழங்கப்பட்டது. இவர்களுக்கான சிறப்பு மதிப்பளிப்பு தமிழ்க் கல்விக் கழகத்தின் 35ஆவது அகவை நிறைவு விழா அரங்கிலே வழங்கப்படும்.
22.02.2025 சனிக்கிழமை தென்மேற்கு மாநிலத் தமிழாலயங்களுக்கான கலைத்திறன் போட்டி காலை 08:30 மணிக்குப் பொதுச்சுடரேற்றலுடன் தொடங்கி 18:30 மணிக்குத் தமிழரது நம்பிக்கையை ஓங்கி ஒலித்தவாறு நிறைவுற்றது. தமிழ்க் கல்விக் கழகத்தின் திட்டமிடலுக்கேற்ப ஐந்து மாநிலங்களில் வடமத்தி, மத்தி மற்றும் தென்மேற்கு மாநிலங்களின் போட்டிகள் நிறைவுற்றுள்ளன. ஏனைய இரு மாநிலங்களுக்குமான போட்டிகளில் தென்மாநிலத் தமிழாலயங்களுக்கிடையேயான போட்டி ஸ்ருற்காட் நகரில் 01.03.2025 சனிக்கிழமையும் வடமாநிலத் தமிழாலயங்களுக்கிடையேயான போட்டி 26.04.2025 சனிக்கிழமையும் நடாத்துவதற்குத் திட்டமிடப்பட்டுள்ளது.